Mos më fol ti mua për veten tënde….

10.05.2023

Mos më fol ti mua për veten tënde….


Mos më fol ti mua për veten tënde….

www.kbi-bujanoc.com

Mos më fol ti mua për veten tënde, qëndrimi yt ndaj çështjeve të njerëzve të tjerë,
do të më tregojë mua se çfarë njeriu je ti

Një burrë tregon:

“Nuk munda ta gjeja sëpatën time, kështu që dyshova se fqinji im e kishte ‎vjedhur dhe fillova ta shikoj me kujdes. Ecja e tij më ngjante me ecjen e hajdutit të sëpatës ‎sime, fjalimi i tij më ngjante, gjithashtu, me hajdutin e sëpatës, madje edhe lëvizjet e tij dhe ‎shenjat e caktuara të duarve, më thoshin mua se askush tjetër nuk e kishte vjedhur sëpatën, ‎përveç tij.‎

Atë natë e kalova i hidhëruar dhe nuk mund të flija, po mendoja se si t’i afrohesha fqinjit tim ‎dhe t’i thosha se unë e di që ai e ka vjedhur sëpatën time. Mirëpo, në mëngjes e gjeta ‎sëpatën nën grumbullin e barit të thatë, të cilin djali im e kishte vendosur mbi të.‎

Ditën tjetër, unë e shikova fqinjin tim dhe tek ai nuk pashë asgjë, që do të tregonte se ai e ‎kishte vjedhur sëpatën time: as në ecjen e tij, as në fjalimin e tij, as në shenjat e duarve të tij. ‎Përkundrazi, gjithçka fliste se ai ishte krejtësisht i pafajshëm.‎

Në atë moment, e kuptova se në fakt unë isha hajdut. E vodha nga fqinji im besimin dhe ‎pafajësinë e tij, e vodha, gjithashtu, nga jeta ime një natë të tërë duke kaluar zgjuar, duke ‎menduar se si të ballafaqohem me njeriun për të cilin isha i bindur se e ka vjedhur sëpatën ‎time, kurse ai ishte i pafajshëm dhe nuk kishte asnjë lidhje me vjedhjen e sëpatës sime.”‎

Nga ky tregim mund të nxjerrim disa mësime, do t’i përmendi tri:‎

‎1. Është fakt se ndjenjat tona e kontrollojnë botëkuptimin tonë për jetën. Kur dikë e duam, ‎ne e shohim vetëm të mirën e atij që e duam, ndërsa nëse shohim ndonjë të keqe tek ai, ne ‎e mashtrojmë vetveten se atë nuk e kemi parë. Dhe e kundërta, kur dikë e urrejmë, ne nuk ‎shohim asgjë tjetër, përveç të keqes tek ai që e urrejmë, ndërsa nëse shohim një të mirë tek ‎ai, vetveten e mashtrojmë dhe e bindim se atë nuk e kemi parë. E vërteta të cilën shumica ‎prej nesh e neglizhon dhe përpiqet të ikë prej saj, është se ne botën e shikojmë më shumë ‎me zemrat tona sesa me mendjet dhe me sytë tanë.‎

‎2. Momenti në të cilin njeriu dyshoi se fqinji i tij ia kishte vjedhur sëpatën, e shtyri që të besonte se ‎ajo me të vërtetë ishte ashtu, ndërsa momenti i bindjes së vërtetë (prova e dukshme), e bindi ‎atë se fqinji i tij ishte i pafajshëm. Shpesh herë ne ndërtojmë fiksime dhe iluzione, ashtu që ‎vetes i vendosim zinxhirë dhe pranga, dhe nëse ndalemi të reflektojmë për problemet tona të ‎shumta, do të zbulojmë se ne në të vërtetë jemi viktima të supozimeve, dyshimeve dhe ‎imagjinatës sonë.‎

‎3. Kur një person sjell gjykim për një çështje, ai me të nuk ua shpjegon të tjerëve të vërtetën ‎për atë çështje, sa ua shpjegon të vërtetën për veten e tij. Ne i bëjmë gjykimet tona në bazë të ‎parimeve tona, ideve tona, vlerave dhe besimeve tona, dhe pikërisht kjo është arsyeja pse ‎njerëzit ndryshojnë në gjykime për të njëjtin rast ose për të njëjtën çështje. Fakti mbetet fakt, ‎por ndryshojnë masat në bazë të së cilave gjykohen njerëzit dhe faktet.

Prandaj, mos më fol ‎ti mua për veten tënde, qëndrimi yt ndaj çështjeve të njerëzve të tjerë, do të më tregojë mua ‎se çfarë njeriu je ti. ‎

Autor: Edhem Sherkavi

Përkthim: Miftar Ajdini

231 Shikime